يا ..حميمي

نقلا عن مدونة طق حنق نشرت النيويورك تايمز التي لا اقرأها مطلقا بالرغم من وجودي في نيويورك لا نها لا تحتوي علي صور سكس.. خبرا عن الدكتور ايمن نور ينص علي انه استلم قرص مدمج من مجهول يحتوي علي تسجيل محادثه حميمة حدثت بينه وبين زوجته ومع القرص تهديد بانه تعدي علي اسياده!! وان المرة القادمة سوف يكون التسجيل صوت وصورة.. بصراحة توقعت حدوث شئ من هذا القبيل ..فحكومتنا حكومة فاجرة لاتختشي ابدا.. والعبد لله بالرغم من ذلك لا يري اي ضرر في حكايةالمحادثات الحميمة التي تحصل تقريبا مع كل المتزوجين بل انا اجزم ان حتي السيد الرئيس حفظه الله لابد وحتما ان يكون له محادثات حميمة واستنباطها ليس بالصعوبة فالسيد الرئيس نشأ و ترعرع في قرية وحقل من حقول مصر الخضراء لذلك فالمحادثه حتما ستكون مشابهة للاتي

السيد الرئيس:سلامو عليكو
السيدة حرم السيد الرئيس:وعليكو السلام اهلا ياحاج
السيد الرئيس:الله هو القصر هس كده ليه.. امال فين حمادة وتوتو
السيدة حرم السيد الرئيس: العيال بره بيسلكوا امورهم اللي في البزنيس واللي في الحزب
السيد الرئيس:يعني احنا لوحدينا ....... يعني ممكن نطلعو طلعة جوية بتاعت زمان.. والله زمان زمان والله
السيدة حرم السيد الرئيس:يا راجل عيب اتلم... ايه... بعد اما شاب حيدخلوه الكتاب
السيد الرئيس:يا ولية شاب ايه بس مالشعر كله اسود اهوه يا دي النيلة... اقولك... انا رايح العب اسكواش احسن
السيدة حرم السيد الرئيس:اسمع ...نظيف اتصل عايز ياخد رأيك في حاجة مهمة
السيد الرئيس:نظيف ايه بس..... ايه الاسامي الغريبه دي ..يكونش مسيحي ...انا قولتلهم هاتولي واحد اسمه عاطف عشان انا بتفأل بالاسم ده قالولي مافيش... خلصو من البلد وعايز ايه سي نضيف ده؟
السيدة حرم السيد الرئيس:يا راجل انت معندكش اي فكرة عل بيجري في البلد.. الناس.. بتوع كفاية دول اللي عاملين قلق
السيد الرئيس: يا ولية انتي ملكيش في السياسة كفاية ايه وحرام ايه.. دول شوية عيال صويع ايه يعني اما 500 ولا 600 واحد يتظاهروا.. لولا ان المره اللي اسمها كوندي دي واخده بالها مننا دلوقت دا كنت عملت الهوايل .. المهم الملايين المشغولة بلقمة العيش والهم والخطة ماشية صح ..اشغل الناس عن حقوقهم وفرق بينهم وغلي عليهم الاسعار وخرب التعليم و التأمين الصحي و طلع واحد زي ابو كرش يلغوش علي الناس كل شوية ويجعلوه عامر
السيده حرم السيد الرئيس: انا عايزاك تظبط الواد كويس علشان لو حصلت حاجه يمسك بدالك علي طول
السيد الرئيس: بلاش تفويل...وبعدين انا شايف ان الواد لسه عظمه طري وده شعب نمرود ما داهية يديهم ديمقراطية بصحيح وبعدين انا قلت لسه مقررتش ..وانتي عارفة انا كلمتي واحدة متنزلش الارض ابدا
السيدة حرم السيد الرئيس:حسني..!!!!
السيد الرئيس:حتنزل المرة دي

------------------------------------------------------------------------------------------------
قال صلاح عبد الصبور رضي الله عنه وعنا جميعا
الحلم جنين الواقع
اما التيجان فانا لااعرف صاحب تاج الا الله
والناس سواسية عندي.. من بينهم يختارون رؤوسا ليسوسوا الامر
فالوالي العادل قبس من نور الله
اما الوالي الظالم فستار يحجب نور الله عن الناس
كي يفرخ تحت عباءته الشر ..هذا قولي يا ولدي

تعليق علي مايحدث

الاحداث المؤسفة التي تقع الان في الاسكندرية ماكان لها ان تحدث لو كان القانون يطبق بجدية...علي حد علمي ينطوي قانون العقوبات المصري علي نصوص قاطعة تنص علي معاقبة من يقوم بالتعدي علي معتقدات الاخرين الدينية وبث الكراهية.....وكمواطن مصري اولا واخيرا اشعر بالاسي من قيام البعض من الطرفين في الاونة الاخيرة بالسخرية والتهكم والتعدي علي مقدسات الاخر الدينية يحدث هذا تحت سمع وبصر الاجهزة الامنية التي تطبق مبدأ فرق تسد ...لاامل في الحكومة الفاسدة التي من مصلحتها قيام البغضاء بين عنصري الامة...يجب علينا نحن الشعب ان نعلم انه ليس هنالك اي خير او مصلحة في لبننه اوبلقنه مصر....والخوف كل الخوف ان يكون ما يحدث الان هو بروفة لمصائب اخري في المستقبل

اما بالنسبة للمسرحية المزعومة فانا لم اشاهدها ولا استطيع ان احكم علي المحتوي بناء علي تصورات الاخرين
يجب ان تقوم النيابة العامة بالتحقيق في الامر ولو كان بالمسرحية اي مساس بالمقدسات والعقائد الاسلامية يعاقب المسئول عنها طبقا للقانون ويكون في ذلك عبرة للجميع ...ولوثبت قيام الصحيفة بافتعال الموضوع لتحقيق مكاسب مادية توقع عليها اغلظ العقوبات.... وليذهب مثيري الفتنة الي اسفل الجحيم

اللي يخاف من العفريت ...يطلعلوه

كثر الكلام هذه الايام عن الشياطين والعفاريت والابالسة والعياذ بالله تجد ذلك في مدونة اخونا يحي مجاهد وايضا عند مدونة مواطن مصريوالعبد لله له تجربة سوداء مع القوي الخارقه للطبيعةوهي قصة حقيقية مائة في المائة ....نرجع للوراء خمسة اعوام كاملة كان العبد لله في حالة غرام ووصال مع فتاة امريكية تدعي ستيسي وهي نباتية تعشق الطبيعة وتؤمن بمعتقدات النيو ايج وفي ليلة ساحرة يحلو فيها الود والتواصل دار بيني وبينها حوار مثل الاتي

هي: ا... انت عمرك جربت الويجي
انا: يعني ايه؟ هي حاجة بتتاكل ولا بتتشرب ولا يمكن وضع جديد من الاوضاع لسة مجربناهوش هههههها اقول هذا وانا احاول فتح ازرار قميصها الداخلي
هي: تنظر الي بغضب وتحكم اغلاق قميصها الداخلي بمامعناه ..انسي..الويجي دي عبارة عن اداة روحية هامة عبارة عن وسيلة للتخاطب مع مرشدك الروحي
انا: مش دي عبارة عن لوح خشب والا ورق وعليه ارقام وحروف وكلام وقال ايه تحطي ايدك علي بتاع بلاستيك البتاع يدور لوحده ويدكي رسالة يا شيخة حرام عليك انت تصدقي الحاجات العبط دي
هي: حاجات عبط !!دانت باين عليك حمار ..الويجي دي موجودة من ايام قدماء المصريين اللي استخداموها في المعابد للكشف عن المستقبل والتاريخ يقول ان فيثاغورس حصل علي معادلاته الرياضية المشهورة عن طريق الويجي
انا لنفسي: فيثا مين؟ يا دي الليلة الكوبية دي زعلانة وضربت بوز وفاكراني بتريق عليها اعمل ايه بس علشان اخلص
نفسي :انت يله البت دماغها مشيعة اظهر لها انك مهتم واسمع لها معلش هاودها علشان ال ................. وجوز ال.
انا: ماشي الحال..................................................... اوكيه
انا : يعني صحيح يا ستيسي الموضوع ده انت جربتيه؟
هي: طبعا في المدرسة الثانوية كنت باستعملها كتير تصدق في مرة سألت عن عن رقم تليفون واحدة صاحبتي كان ضايع مني والمؤشر لف لوحده علي اللوح واظهر لي الارقام كلها وفي مرة قال لي اني حاسيب ميزوري وحاجي اعيش في نيو يورك وبالظبط ده اللي حصل ..استعمال الوبجي وسيلة جيدة للتخاطب مع العالم الاخر او مع نفسك العليا..قالت ذلك وهي سعيدة ضاحكة
انا: اوه دي حاجة جميلة خالص انا نفسي في يوم من الايام اجرب حاجة زي كده اكيد حاستفيد روحيا وعقليا جدا ...قلت هذا ويدي تحاول فك الازرار اللعينة ..ستيسي علي فكرة هو اللي بتاع ده بينفك ازاي علشان انا اتخنقت
وتمضي الاسابيع والشهور وافترق انا وستيسي ربما الي الابد وتطوي صفحة من عمري بخيرها وشرها وتمر الشهور بطيئة بعد ذلك وفي يوم من ايام شتاء نيويورك البارد دخلت محل من محلات بارنز اند نوبل الشهيرة لبيع الكتب لاستعمال الحمام النظيف بالطبع علي اساس انه حمام مثقفين والذي يختلف اختلاف جذري عن حمامات ماكدونالدذ التي يشخ فيها الاوباش والرعاع وبعد قضاء الحاجة اخذت اتصفح الكتب والمعروضات وتقع عيني علي الويجي وافتكر الذي دار بيني وبينها.. التقطت العلبة واشترتها وذهبت الي شقتي الخالية مسرعا لمحاولة فك السر الذي كنت متأكد انه عبارة عن مغناطيس او زمبلك اوخدعة معينة لانه من غير المعقول ان يتحرك المؤشر من تلقاء نفسه فتحت العلبة واخذت ابحث علي اي مغناطيس او خدعة فلم اجد ..وضعت اللوح علي الارض ووضعت المؤشر علي اللوح وبطرف اصابع ايدي لمست المؤشر واخذت اعد نبضات قلبي مثلما هو مكتوب في كتيب طريقة الاستمال ثم بصوت منخفض سألت عن تاريخ ميلادي وفجأة شعرت بخطوات بطيئة تمشي في الشقة واخذ المؤشر يرتعش علي اللوح وستارة الشباك تتحرك بالرغم من ان الشباك مغلق صرخت في فزع.. مييييين؟ لااجابة.. احس بالخطوات البطيئة التي لااستطيع ان احدد من اين مصدرها وهنا دار حوار بيني وبين نفسي
انا: الساعة 11 باليل وفي حد ماشي في الشقة عندي
نفسي: تخيلات كل اللي بتشوفه وتحسه ده تخيلات.. ده باين واحد من الجيران اللي فوق بيتمشي والسقف بيسمع.. والستارة بتتحرك علشان الشباك بينفس ..والمؤشر بيرفرف علشان ايدك بتترعش علشان انت خايف
انا: احه... بقولك الساعة 11 باليل وفي حد بيتمشي في الشقة
نفسي: وانا اعمل لاهلك ايه؟ انت السبب ...اقفل البتاعه دي الله يخرب بيتك
انا: ماشي الحال................................................................ اوكيه
اغلقت اللوح سريعا وتخلصت منه خارج المنزل وفجأة اختفي صوت الاقدام ورجعت الستارة الي حالة السكون ونمت تلك الليلة مفتح عين ومغمض عين واخذت اتلفت حولي كل عشر دقائق لمدة اسبوع حتي تيقنت مع عدم وجود عفاريت اوبعابيع في الشقة....لذلك يا اصدقائي الاعزاء عندما اسمع عن الشياطين والعفاريت اضع علي وجهي التعبير الذي كان يضعه الاستاذ اسماعيل ياسين علي وجهه في افلامه عندما كان يري عفريت او حاجة مخيفة واسرسع مثله لاااااااااوالنببببببببببي

جيرانا الطيبون

-and you ...whats your background?
-i was born in Egypt, i am an Egyptian
-oh Egypt....our good neighbors
جيرانا الطيبون.... لاتزال هذة الكلمة ترن في اذني حتي بعد سنوات من سماعها من قبل سيدة اسرائيلية تعتبرنا جيرانها الطيبون اما نحن فماذا نعتبرهم؟ حتي الان عيني ترف عندما اسمع كلمة اسرائيل لا تزال صورة ناصر في مخيلتي وكلمات امل دنقل لا تصالح تصرخ في اذني ...اعترف اني احاول نسيان هذا احاول ان اقنع نفسي جاهدا انهم ليسوا العدو وان العدو الحقيقي يقبع في قصر القبة ...بيننا وبين اسرائيل معاهدة سلام وتقوم الحكومة المصرية بموجب هذة المعاهدة بالتعاون مع اسرائيل في مجالات عديدة وبالرغم من ذلك يصور لنا النظام الحاكم من خلال ابواقه باسلوب مباشر او غير مباشر ان اسرائيل مسئولة عن كافة مشاكلنا لالهاء الشعب عن المصدر الاساسي للبلاوي وهو بالطبع ابوجمال وعصابته ...اسرائيل هي البعبع الذي يجب ان نخاف منه امنا الغولة المسئولة عن الغلاء والمرض والفقر ...اسرائيل... اسرائيل كانها عمل اتعملنا

في محاولة لفهم الاخر ادعوكم لتصفح كتاب عادل حمودة القديم الرائع ...تحت جلد اسرائيل... يستكشف عادل حمودة المجتمع الاسرائيلي ويسخر منه ويقوم بتصنيفهم كاناس عاديين منهم الجيد ومنهم الطالح منهم المحب للسلم ومنهم العنصري القذر ..يجب ان نعلم جيدا ان صراعنا مع اسرائيل هو صراع حدودي وليس وجودي خلافنا مع الصهيونية وليس اليهودية من المؤسف ان يكون بين العرب واليهود عدواة بالرغم من صلة الدم والكثير من التراث المشترك افتح قلبك ومد ايديك للاخر الذي يريد السلام وانسي ولو لمرة الذي تعلمته مرغما