صباح النووي والتجلي والانتاج المحلي

فور سماعي بخبر عزم مصر علي الدخول الي قائمة الدول النووية برز وجه سيادة الرئيس علي الفور في مخيلتي فسيادة الرئيس دائما هو رجل الساعة... الساعة الرولكس الذي يلبسها سيادته في يده الشمال... المنهوبة بالطبع من اموال الشعب.... فهذه الفكرة الجهنمية النووية بالطبع هي من افكار سيادته التي هي نتاج الزهايمر والعياذ بالله ورغبه سيادته المحمومة في التكويش علي الملايين والبلايين والعالمين ببواطن الامور يعلمون ان الموضوع بدأ كالاتي

سيادة الرئيس: صارخا ...خش ياااا عاطف
معالي رئيس الوزرا:يا فندم عاطف مين ؟انا نظيف
سيادة الرئيس:نظيف ايه ..انت حتتمنظر؟ اسمع يا عاطف انا قررت ان احنا حندخل عصر الطاقة النووية ..واخد بالك يا عاطف دي حاجة علشان ننيم بيها الناس يعني علي الششني كده علشان يغنوا علي النووي في اوبريت اكتوبر ودي حاجة كويسة حتجيب الرزق من معونة و عمولة وسمسرة وخلافة واخد بالك..لازم الاول اكلم الامريكان ..حط لي كلينتون علي التليفون
معالي رئيس الوزرا: يا فندم مافيش كلينتون ..ده جورج بوش دلوقتي رئيس امريكا
السيد الرئيس :عارفه ..جورج بوش بتاع السي اي ايه ده حبيبي ..هو رجع رئيس امريكا تاني؟
معالي رئيس الوزرا: لا سيادتك دا ابنه جورج دبليو بوش
سيادة الرئيس: الله هو ابنه كبر وخلص جامعة وبقي رئيس امريكا ..ماشاء الله ..طب سيبك من امريكا دلوقت ..احنا عايزين يا عاطف معونة فنية حط لي شاوشيسكو بتاع رومانيا علي التليفون
معالي رئيس الوزرا: يا فندم شاوشيسكو مات
سيادة الرئيس: مات لا حول الله ...طب حط لي اخونا فهد علي التليفون علشان اطلب منه قرض بدون فوايد
معالي رئيس الوزرا: يا فندم الملك فهد مات
السيد الرئيس: مات لاحول الله ...طب حط لي رابين علي التليفون علشان اطمنه وان الموضوع كله في الهجايس
معالي رئيس الوزرا: يا فندم رابين مات
سيادة الرئيس: مات راخر ..تصدق يا عاطف انا مش مستريحلك شكلك كده حتاخد السكة قريب ...طب حط لي عرفات علي التليفون علشان اقوله ان موضوع النووي علشان خاطر القضية والعروبة والكلام البطيخي ده
معالي رئيس الوزرا: سيادتك عرفات مات
السيد الرئيس: الله هما كلهم ماتوا... امال انا بدين ابوكو لسه عايش ازاي؟؟؟؟؟
معالي رئيس الوزرا: ما داحنا اللي مش فاهمينه سيادتك