علي عوض .....في البحرين

خبر في جميع القنوات الاخبارية في التليفزيون ان مايكل جاكسون سوف يسافر بدعوة شخصية من ملك البحرين لقضاء اجازة علي شرف الاسرة الحاكمة ......؟؟؟؟ مش عارف لية؟؟ قاعد اهرش في دماغي باحاول اجد تفسير لدعوة واحد منحرف زيه بيجد متعة في الاعتداء الجنسي علي الاطفال والله مش فاهم.... مايكل جاكسون استطاع ان يفلت من العدالة بسبب انه مشهور وللاسف في امريكا لو كنت غني ومشهور العدالة سوف تختلف .... طب الاخ ملك البحرين عايز يشوفه لية؟؟؟ انا خايف في البحرين مايكل جاكسون يشوف اعلان ابتسامة مصر مبتناسيش .... وكرباج ورااا يا اسطي

السياسة من منظور تحتي

نقلا عن صحيفة القدس العربي اللندنية ان الاخوة في ايران بعد الفحص والتمحيص في ان السبب الرئيسي لعداء الادارة الامريكية الحالية للنظام الحاكم في طهران هو ....امسك اعصابك هو ان كونداليزا رايس كانت علي علاقة زمان ايام الجامعة بطالب ايراني وانه بالمصري اداها بمبة وعلشان كدة من كتر الشوق والهجر والحرمان زعلانة من الايرانيين ...... وان الحاج البرادعي مسؤل الامم المتحدة مطنش علي البرنامج النووي الايراني بسبب ان زوجته من اصل ايراني انتهي الخبر .....ياسلام اية الحلاوة دي القدرة الغريبة لاختذال كل شئ الي الفحولة الجنسية وما بين افخاذ النساء ليس السبب الديكتاتورية واهدار حقوق الانسان والاقليات ليس السبب ان الامم المتحدة اصبحت مجرد خيال ظل لا السبب في ان العالم كله يكرهنا هو الجنس نظرية الفاعل والمفعول المسيطرة علي العقلية الشرق اوسطية كلامنا جنس قهوتنا جنس وحياتنا المقهورة جنس بعد ذلك نتحدث عن الاخلاق 24 ساعة في اليوم ونرجم المراة بقلوب باردة و نرفض كل الرفض اعطاء الانسان حق تقرير مصيرحياته
الاخوة في ايران محتاجين مهادئات جنسية والله اعلم

حبيبة قلبي ...... نورما شيير

حب من اول نظرة شوفوا عنيها جميلة ازاي نورما شيير ملكة هوليود المتوجة في الثلاثينات والاربعينات وقعت في حبها من اول نظرة سحرتني العيون زي مابيقولوا في ليلة سودة ماجليش فيها نوم ومكانش في سجائر ومش عارف انام فتحت التليفزيون علي تيرنر كلاسيك وهي قناة مختصة بالافلام القديمة وكان في فيلم وثائقي عنها شدني قعدت اتفرج عليه لحد 3 صباحا اول حاجة تشدك شخصيتها والجاذبية الطاغية والتلقائية الشديدة في التعامل مع الرجال المدهش ان قوانين الرقابة في الثلاثينات اتغيرت واصبحت اكثر تشدد بسبب ان نورما شيير غيرت العلاقة بين الرجل والمراة في افلامها واظهرت جانب رغبة المراة اللي مكانش موجود قبلا في الافلام اعتزلت السينما وهي في اوج عزها في منتصف الاربعينات و ماتت وحيدة في بيت للمسنين في الثمانينات .... مش حاجة تزعل برضه
this post is for you Irene , you are always in my mind

بيان من الجبهة الشعبية لمكافحة التعريص

اه ... من يوقف في راسي الطواحين؟ومن ينزع من قلبي السكاكين؟ومن يقتل اطفالي المساكين لئلا يكبروا في الشقق المفروشة الحمراء خدامين ....مابونين ....قوادين
هذه الارض التي ما وعد الله بها من خرجوا من صلبها وانغرسوا في تربها وانطرحوا في حبها مستشهدين ! ..... فادخلوها بسلام امنين
العظيم امل دنقل

ملحوظة التعريص كلمة تطلق في شوارع مصر المحروسة علي القوادة وملحوظة اخري الجبهة الشعبية لمكافحة التعريص ج ش م ت !!! من تاليفي انا وانا هو العضو الوحيد بها (الي الان ) وليس لها اي قريب او بعيد بالاخوة والاخوات الذين قاموا بتصميم البوستر الرائع

يعني اية كلمة وطن؟

اشعر بحالة من القرف الحزن الخجل الشديد بعد مطالعة الشهادات البشعة عن تعذيب النساء في اقسام شرطة مصر المحروسة تستطيع قراءة الشهادات كاملة عند منال وعلاء وسوف يصفعك السؤال عن معني كلمة وطن ينتهك فيه حقوق الانسان ويغتصب فيه البسطاء ويمارس فيه اسلوب النازي في التعامل مع الشعب و عن معني كلمة وطنية والعدو (الوطني) بيننا يطالعنا كل يوم بوجهه القبيح تحلم مثلي بالمنقذ وسيف العدل وراية العقاب ساطعة في الاوج و لكن تصحوا علي كافور وشفته المثقوبة والرجولة المسلوبة وتقسم علي انه لابد ان ياتي المهدي في يوم من الايام

الريس ابن البوسطجي

ابوه كان بوسطجي مش باشا ولا وزير جده كان فلاح صعيدي مش امير من الف ليلة وليلة يعني كان واحد مننا عبدالناصر شخصية عجيبة علاقتي به موزعة بين الاعجاب الشديد والحيرة,جدتي الله يرحمها كانت معجبة به جدا تتكلم عنه كانه واحد من العائلة بتاعتنا كان عندها اطنان من مجلات المصور تاريخها يرجع للخمسينات والسيتينات من القرن الماضي كنت اقعد اقراء بالساعات عنه تشوفة في دمشق ايام الوحدة لما الناس شالوه بالعربية بتاعته وتشوفه و هو الشارع في القاهرة والناس زحمه حواليه عايزة تسلم علية اية الموضوع? الوطنية ,عبد الناصر زرع الوطنية في قلب جدتي وقلب الناس اما انا ساعات احس انه الفارس الاخير وساعات العن ابوه علي اساس انه السبب في ان اشباه الرجال في بلدنا لسة بيحكمونا بص في صورة خطاب التنحي بص في عينه حتشوف ايزيس بتبكي اوزاريس لا بص في عينه كويس حتشوف صائد الدبابات وحتشوف العلم مرفوع علي الضفة التانية ,هو ده عبد الناصر,استئذن حضراتكم سوف اضع عبد الناصر في دولابي تاني واقفل عليه

انا مين ؟؟

اناواحد مصري مغترب بحب مصر وبعشق اسكندرية نفسي وطني يصحي علي ديمقراطية وحرية سياسية وانتخابات حرة ومساواة وعدالة اجتماعية انا مش اشتراكي ولاشيوعي لاناصري او وفدي بالرغم اني بحترم كافة الاراء السياسية والمذاهب التقدمية الي بتسعي لمصلحة مصر انا عندي ايمان بالقومية المصرية البوتقة الي تجمعنا كلنا للوصول لمستقبل افضل

الطائر الحزين

الاولة اه

ضروري اكتب ,حاسس بداخلي اشياء كتير لازم اعبرعنها ,كنت فاكر نفسي وحيد لكن اكتشفت ان في ناس كتير بتشاركني امنياتي ,ناس مثلكم عايزة بلدنا مصر ام الدنيا تكون احسن واحسن.بشكر علاء ومنال وواحدة مصريةويحيي مجاهدوحمكشة.يلا ملعون ابو الغربة علي ابو الجرين والاولة اه